ཟླ་འདིའི་ཚེས་༡ ཉིན་གངས་སྐྱིད་ཕྱི་དྲིལ་ཚོགས་ཁང་དུ་བོད་གཞུང་མང་ཛ་དྲག་ལས་འགུལ་ཚོགས་ཆུང་གིས་གསར་འགོད་གསལ་བསྒྲགས་ཤིག་གནང་ཡོད་པ་དང༌། བོད་ནང་དུ་ཉེན་རྟོག་པ་དང༌། དམག་མི་མང་དུ་བཏང་ནས་ཧ་ཅང་དམ་དྲག་འོག་བོད་ཀྱི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པ་དང༌། ས་གནས་ཀྱི་བཙོན་ཁང་ཁེངས་ནས་བཙོན་པ་ས་གནས་གཞན་དུ་གནས་སྤོ་བྱེད་ཀྱི་ཡོད་པའི་སྐོར་དང༌། བཙན་བྱོལ་ནང་དུ་ཟླ་འདིའི་ཚེས་༤ ཉིན་ས་གནས་སོ་སོར་བླ་ཆེན་ནམ་མཁན་སྤྲུལ་དབུ་བཞུགས་ཀྱིས་སེར་སྐྱ་མི་མང་ནས་སྨོན་ལམ་གསོག་འདོན་གནང་རྒྱུ་དང༌། ས་གནས་སོ་སོར་ཟས་བཅད་ངོ་རྒོལ་དང་འབྲེལ་དྭང་བླངས་བ་གང་མང་ནས་མགོ་རིལ་བཟོ་རྒྱུ། ཚེས་༡༠ ནས་༡༢ བར་ལྡི་ལི་དང༌། ཀོལ་ཀ་ཏ། མུམ་བྷེ། བལ་ཡུལ་ཀ་ཐ་མན་གྲུ། ཕྱི་རྒྱལ་ཡུལ་གྲུ་ཁག་ཏུ་བོད་ནང་གི་ལས་འགུལ་ཁྲོད་འདས་གྲོངས་སུ་ཕྱིན་པ་རྣམས་ཀྱི་སྐུ་ཕུང་མཚོན་བྱེད་ཕུང་པོ་རྫུན་མ་ཁྱེར་ཏེ་ཁྲོམ་སྐོར་བྱེད་རྒྱུ་དང༌། ས་གནས་ལ་ཕྱི་རྒྱལ་གཞུང་ཚབ་ཡན་ལག་ཡོད་ཚེ། དེའི་སྐབས་གང་མང་གདན་ཞུ་ཐུབ་ཐབས་གནང་གལ། ཚེས་༡༡ ཉིན་རྒྱ་གཞུང་གིས་བོད་ཀྱི་བཙོན་པར་མནར་གཅོད་གཏོང་ཚུལ་འཁྲབ་སྟོན་དང་བཅས་ཁྲོམ་སྐོར་བྱ་རྒྱུ། ཚེས་༡༢ ཉིན་ཉེ་དུས་བོད་ནང་རྒྱ་དམར་གྱིས་དྲག་གནོན་བྱས་ཏེ་རྨས་སྐྱོན་ཕོག་ཚུལ་འཁྲབ་སྟོན་དང་འབྲེལ་ཁྲོམ་སྐོར་བྱ་རྒྱུ། ཚེས་༡༧ ཉིན་ལྡི་ལིར་ཨོ་ལིམ་ཕིག་དཔལ་འབར་འབྱོར་བའི་ཉིན་མོ་ཡིན་སྟབས། ལྡི་ལིར་གནས་བཞུགས་བོད་མི་ཡོངས་ནས་ས་གནས་སྐོར་སྲུང་བར་ལུགས་མཐུན་བཀའ་ཁྲོལ་ཞུས་ཏེ། ཇན་ཏར་མན་ཏར་དུ་འཛོམས་ནས་ཨོ་ལིམ་ཕིག་རྒྱ་ནག་ཏུ་ཚུགས་རྒྱུར་ངོ་རྒོལ་མེད་ཀྱང༌། བོད་ནང་འགྲོ་བ་མིའི་ཐོབ་ཐང་དགོས་པའི་ལས་འགུལ་ཉིན་འཁྱོངས་སྤེལ་རྒྱུ་ཡིན་པ་དང༌། གཞུང་མང་ཛ་དྲག་ཚོགས་ཆུང་གི་ལམ་སྟོན་གྱི་རྒྱ་ལས་མ་བརྒལ་བའི་ཐོག་ནས་ལས་འགུལ་འཕར་མ་ཇི་སྤེལ་ལ་དགའ་བསུ་ཡོད་སྐོར་སོགས་ཀྱི་གསལ་བསྒྲགས་སྤེལ་ཡོད་པ་རེད།།